clicca qui per la leggenda del tortano in prosa

‘A LEGGENDA D’O TORTANO

Doppo sulo tre ghiuorne ch’era muorto,

a Pasqua, Gesù Cristo era risorto.

Currette tutt’attuorno nu’ sorriso:

ncopp’a terra, ma pure n’Paraviso.

Il Babbo (‘o Pataterno) è stracontento.

Va guardann’o rilorgio ogne mumento:

“Mo’ vene!” Pe l’accogliere, a Maronna

s’a miso ‘o meglio manto, e ‘a meglia gonna.

Pe stu guaglione, quanto hanno penato!

S’è sbattuto, ha pregato, ha predicato

(pe c’aiutà perdette pur’ a voce,

e nuje, pe’ premio, l’ammo miso ‘ncroce).

Mo’ c’arriva, se fa ‘na granna festa:

c’a carne, ‘o pesce, e cicere, e a menesta;

s’abballa fino all’alba, mmiez’e stelle,

ch’e Sante, l’angiulille e l’angiulelle!

Ma pass’o tiempo, e Cristo nun se vede.

“Gesù. Chesto si o conto, nun se crede.

E che miseria. Né, tu si risorto:

e vuò sagliere ncoppa, a chi t’è…..?

Ecco qua, mò pur’i aggio iastummato.

Pietro, nunn’è c’avesseno sunato?”

Oramai s’era fatto un certo orario,

e tutt’e sant’e copp’o calennario

s’offretteno pe scennere quaggiù

p’avè quacche notizia di Gesù.

“Pe quant’è vero ca me chiammo Dio

nun ce mann’a nisciuno: ce vac’io!”

Scennette a volo. Sorvolaje l’Inferno,

e cu’ nu naso fine ‘e Pataterno

ca ngarra sempe, e nun se sbaglia mai:

Napoli, via San Biagio dei Librai.

Era nu’ vico scuro, luongo e stritto.

Dio, senza fa remmore, zittu zitto,

c’a guida ‘e certi vvoce, dint’a niente

fernette int’a na casa chiena ‘e gente.

Tranquillo, a caputavola assettato,

 parlanno mò cull’uno, e mò cull’ato,

Gesù, ca mazzecava un grosso pezzo

‘e na ciambella con un buco in mezzo.

Dio lle dicette:  “Figlio! ….di mappina,

nuje te stammo aspettann’a stammatina,

e tu si ghiuto a cena cull’amice?

Sì na carogna,  tu, e chi nun t’o dice!

Gesù, verenn’o Pate, s’era aizato.

 “Babbo caro, perdonami. Ho sbagliato,

ma ‘a colpa è stata ‘ a lloro: ‘e sti’ perzone.

Per festeggiare la Resurrezione,

m’hanno fatto ‘na torta sopraffina

c’e cicole, cu ll’ova e c’a farina:

‘o tortano. Sta ccà, fresco sfurnato:

guarda che meraviglia del Creato!

Quanno resuscetaje, sentette addore….

Se dice: vide Napule e po’ muore,

e  - tu lo sai ca i’  sò straordinario-

aggio voluto fa tutt’o cuntrario:

primma so muorto, e doppo so’ venuto.

Vaco ncielo? Ma no, aggio riflettuto:

pè sta assieme cu mamma e cu papà,

i’ tengo, d’oggi in poi, l’eternità.

Succede na’ tragedia (manc’e cane)

se invece ‘e saglì mò, salg’ dimane?

Seguenno  stu prufummo,  là pe’ là

me trovaje miez’e strade ‘e sta città.

Ccà se fanno ‘e pasture ‘e terracotta,

(a Natale ce sta nu votta votta….)

Sì, so’ e presepie e San Gregorio Armeno:

ce stongh’i, ‘appena nato, dint’o fieno.

(L’asino e’o bue, papà, m’hanno scarfato:

si era pe’ te, murev’assiderato….. 

Ce steva san Giuseppe, cu Mammà.

‘O  ssaccio, e chesto nun ne vuò parlà….)

Turnann’a nuje: ve site preoccupate,

ca chi ‘o ssape che m’era capitate…

Va buono, mò è fernuto ‘o melodramma.

Saluto a chest’amice, e ce ne jamme.

Fratelli: fate il Bene, e non il Male:

ce vedimme al Giudizio Universale.

Stu’ tortano, guagliò, se po’ ncarta?,

pecchè pure Mammà l’adda  pruvà.

Papà, dacce nu’ muorzo, pe’ favore,

e mi perdonerai di tutto cuore:

m’aggio creduto, appena l’ho assaggiato,

ca ‘n Paraviso, i’ già c’ero arrivato!